कामांचे प्रस्ताव, मंजुरीची प्रकरणे, निर्णयांची अंमलबजावणी जलदगतीने होणार :आयुक्त डांगे
महापालिकेत ई ऑफिस प्रणालीच्या माध्यमातून ऑनलाईन कामकाज
। अहिल्यानगर । दि. 14 नोव्हेंबर । इंटरनेटचा वाढता प्रसार आणि सरकारी सेवा ऑनलाईन उपलब्ध करून देण्याच्या लोकांच्या अपेक्षा वाढल्या आहेत. ऑनलाईन कामकाजामुळे वेळेची बचत होऊन नागरिकांचे अर्ज, कामांचे प्रस्ताव, इतर प्रकरणांवर जलद निर्णय घेणे शक्य आहे. त्यामुळे नगर महापालिकेत ई ऑफिस प्रणाली कार्यान्वित करण्यात आल्याची माहिती आयुक्त यशवंत डांगे यांनी दिली. कामकाजाला गती देण्यासाठी ही प्रणाली कार्यान्वित करण्यात आली असून, यामुळे प्रशासकीय प्रस्ताव जलदगतीने मार्गी लागून नागरिकांची कामे वेळेत होतील, असा विश्‍वास त्यांनी व्यक्त केला. अशी प्रणाली राबवून ऑनलाईन कामकाज करणारी नगर महापालिका ही ड वर्ग महापालिकांमध्ये पहिलीच ठरल्याचेही त्यांनी सांगितले.
👉येथे क्लिक करा आणि वाचा साप्ताहिक विजयमार्ग
आयुक्त यशवंत डांगे यांच्या संकल्पनेतून ई ऑफीस प्रणाली राबवण्याचा निर्णय घेण्यात आला. महापालिकेच्या सामान्य प्रशासन विभाग, आस्थापना विभाग, संगणक विभाग, भांडार विभाग या विभागांचे कामकाज तात्काळ ई ऑफीस प्रक्रियेने सुरू करण्यात आले. आयुक्त डांगे यांनी या प्रणालीचे उदघाटन करून विधानसभा निवडणुकीत मतदान करण्याकरीता सार्वजनिक सुट्टीचा आदेश डिजिटल स्वाक्षरी करून विभागांना ऑनलाईन जारी केला. यावेळी उपायुक्त डॉ. विजयकुमार मुंडे, डॉ. संतोष टेंगळे, सहाय्यक आयुक्त मेहेर लहारे, संगणक विभाग प्रमुख अंबादास साळी, शहर अभियंता मनोज पारखे, जलअभियंता परिमल निकम,शेखर बनकर,संतोष राठोड उपस्थित होते. ई ऑफिस प्रणाली कार्यान्वित करण्यासाठी या प्रणालीवर सर्व कर्मचार्‍यांचे आयडी, डिजिटल स्वाक्षरी, कार्यालयातील आस्थापना तक्ता अद्ययावत करण्यात आला आहे.
👉येथे क्लिक करा आणि वाचा साप्ताहिक विजयमार्ग
त्यानुसार सर्व सॉफ्टवेअर संगणक विभागाकडून अ्द्यावत करण्यात आले आहेत. ई ऑफिस प्रणालीमध्ये फाईल्सचा जलद गतीने निपटारा होणार आहे. वेगवेगळ्या स्तरावर फायलींच्या मंजुरी, त्यावर होणारा मनुष्यबळाचा खर्च, वेळेची बचत होऊन तात्काळ निर्णय होणार आहेत. या प्रणालीमध्ये कामकाज पेपरलेस होवून, फायली सांभाळण्याकरीता लागणारी यंत्रणा, त्यावर होणार्‍या खर्चाची बचत तर होईलच, यासह फायली गहाळ होण्याचे टळतील, असे आयुक्त डांगे यांनी सांगितले.
👉येथे क्लिक करा आणि वाचा साप्ताहिक विजयमार्ग
दुसर्‍या टप्प्यात नागरिकांना ऑनलाईन सेवा
ई ऑफिस प्रणालीच्या माध्यमातून महापालिकेतील प्रशासकीय कामकाज पहिल्या टप्प्यात ऑनलाईन करण्यात येत आहे. सर्व विभागांचे कामकाज ई ऑफिस प्रणालीच्या माध्यमातून सुरळीत झाल्यावर दुसर्‍या टप्प्यात नागरिकांना ऑनलाईन सेवा सुरू करण्याचा प्रयत्न आहे. महापालिकेच्या माहिती व सुविधा केंद्राचे कामही ई ऑफिसच्या प्रणालीद्वारे ऑनलाईन करण्याचा प्रयत्न असल्याचे आयुक्त यशवंत डांगे यांनी सांगितले.
👉येथे क्लिक करा आणि वाचा साप्ताहिक विजयमार्ग