। अहमदनगर । दि.13 जानेवारी 2023 । कोयता बाळगणार्‍या तरूणास तोफखाना पोलिसांच्या गुन्हे शोध पथकाने पत्रकार चौकातील शहीद भगतसिंग उद्यानाजवळ अटक केली. वैभव केदारनाथ वाल्हेकर (वय 23 रा. वैदूवाडी, सावेडी) असे त्याचे नाव आहे. त्याच्याकडून कोयता जप्त केला आहे.
पोलीस अंमलदार सचिन जगताप यांच्या फिर्यादीवरून वाल्हेकर विरोधात गुन्हा दाखल केला आहे.
सावेडीतील पत्रकार चौकातील शहीद भगतसिंग उद्यानाजवळ थांबलेल्या एका तरूणाकडे कोयता असल्याची माहिती उपनिरीक्षक समाधान साळुंके यांना मिळाली होती. पोलीस निरीक्षक ज्योती गडकरी यांच्या मार्गदर्शनाखाली उपनिरीक्षक साळुंके, पोलीस अंमलदार अविनाश वाकचौरे, जगताप यांच्या पथकाने ही कारवाई केली.
कोतवाली पोलीस ठाण्याचे निरीक्षक संपत शिंदे यांच्या मार्गदर्शनाखाली पोलीस अंमलदार श्रीकांत खताडे, होमगार्ड गणेश शिंदे बुधवारी रात्री कोतवाली हद्दीत गस्त घालत असताना माळीवाडा बस स्थानक समोर जिल्हा परिषद कार्यालयाच्या गेटवरच एक इसम रस्त्याने जाणार्‍या-येणर्‍या लोकांमध्ये दहशत निर्माण करण्यासाठी कोयता घेऊन फिरत होता.
त्याला पथकाने ताब्यात घेत अटक केली. त्याने त्याचे नाव अभिजित दत्तात्रय क्षीरसागर (वय 22 रा. काटवण खंडोबा) असे सांगितले. त्याच्याकडून एक कोयता जप्त केला असून अंमलदार खताडे यांच्या फिर्यादीवरून गुन्हा दाखल केला आहे.