। अहमदनगर । दि.07 जुलै । पत्नीस जमीन वहिवाट करण्यास हरकत घेतल्याने राग येऊन पत्नीने अन्य तिघांसह 62 वर्षीय शेतकर्यास झाडाला बांधून लाकडी दांडक्याने व दगडाने बेदम मारहाण करून त्याचा खून केला. ही घटना पाथर्डी तालुक्यातील नरवडे वस्ती येथे घडली.
याबाबतची माहिती अशी की राधाकिसन नरवडे (वय 62, राहणार नरवडे वस्ती, पाथर्डी) यांनी त्यांच्या शेत जमिनीत गयाबाई नरवाडे हीस जमीन वहिवाट करण्यास हरकत घेतली.
याचा राग येऊन गयाबाई नरवडे हिने तसेच संदीप ढाळे, मीरा ढाळे (दोघे राहणार वरुड, शेवगाव) अनिता झिरपे (राहणार धनगर गल्ली, शेवगाव) यांनी संगनमत करून राधाकिसन नरवडे यांना लिंबाच्या झाडाला बांधून लाकडी दांड्याने व दगडाने बेदम मारहाण केली.
या मारामुळे ते मरण पावले. राधाकिसन नरोडे यांचा खून केल्याची माहिती समजताच लक्ष्मण आडसरे (वय 45, राहणार शेवगाव रोड, तिसगाव, पाथर्डी) हा तिथे पाहण्यासाठी गेले असता आरोपींनी त्यास दमदाटी व शिवीगाळ करून हाकलून दिले.
याप्रकरणी पाथर्डी पोलिसांनी लक्ष्मण आडसरे यांच्या फिर्यादीवरून खुनाच्या गुन्ह्याची नोंद केली. अधिक तपास सहाय्यक पोलिस निरीक्षक वाघ करीत आहेत.