। अहमदनगर । दि.15 जुलै । राहत्या बंद घराच्या दरवाजाचे कडी-कोयंडा-कुलूप तोडून अज्ञात चोरांनी आत प्रवेश केला आणि घरातील सोन्या-चांदीचे दागिने व रोख रक्कम असा सुमारे दोन लाख एकोणतीस हजार सातशे रुपये किमतीचा ऐवज लंपास केला.
ही घटना शेवगाव तालुक्यातील पाटेकर वस्ती (मलकापूर) येथे घडली. याबाबत माहिती अशी अण्णासाहेब पाटेकर (वय 52, रा. पाटेकर वस्ती, मलकापूर, शेवगाव) यांच्या बंद घराच्या दरवाज्याची कडी-कोयंडा-कुलूप तोडून अज्ञात चोराने आत प्रवेश केला व आतील सामानाची उचकापाचक केली.
बेडरुममधील कपाटातील सोन्याचे मंगळसूत्र, गंठण, सोन्याची ठुशी, कानातील फुले, सोन्याचे मणी, मोहनमाळ, नथ, सोन्याचे मणी, चांदीचे कडे व रोकड असा दोन लाख 29 हजार सातशे रुपयांचा ऐवज चोरून नेला. याप्रकरणी बेलवंडी पोलिसांनी घरफोडीच्या गुन्ह्याची नोंद केली. अधिक तपास सहाय्यक पोलिस निरीक्षक ठाकरे करीत आहेत.