शिर्डी, (दि.31 ऑगस्ट) : संगमनेर शहर व तालुक्यातील कोरोना साखळी संपुष्टात आणण्यासाठी करावयाच्या उपाययोजना आणि शहरातील गणेश विसर्जन शांततेत पार पाडण्यासाठी प्रशासन व शांतता कमिटीने केलेल्या उपाययोजनांचा आढावा महसूल मंत्री बाळासाहेब थोरात यांनी घेतला.
अमृतवाहिनी अभियांत्रिकी महाविद्यालयातील अमृत कला मंच येथे सोशल डिस्टन्सिंगचे पालन करून झालेल्या बैठकीस आ.डॉ.सुधीर तांबे, नगराध्यक्ष सौ.दुर्गा तांबे, अ‍ॅड. आर.बी.सोनवणे, प्रांताधिकारी शशिकांत मंगळूरे, तहसीलदार अमोल निकम, उपविभागीय पोलीस अधिकारी रोशन पंडीत, नगरपालिकेचे मुख्याधिकारी सचिन बांगर, पंचायत समिती गट विकास अधिकारी सुरेश शिंदे, पोलीस निरीक्षक अभय परमार, पोलीस निरीक्षक सुनील पाटील, तालुका आरोग्य अधिकारी सुरेश घोलप व अन्य प्रशासकीय अधिकारी उपस्थित होते.
या बैठकीत तालुका व शहरातील कोरोना संक्रमणाची साखळी पूर्णपणे तोडण्यासाठी प्रशासनाकडून केल्या जात असलेल्या उपाययोजना तसेच गणेश विसर्जनाच्या पार्श्‍वभूमीवर केलेल्या विविध उपाययोजनांची माहिती अधिकाऱ्यांनी मंत्री बाळासाहेब थोरात यांना दिली. याचा आढावा घेऊन मंत्रीमहोदयांनी प्रशासकीय अधिकाऱ्यांना सूचना केल्या.
याप्रसंगी मंत्री बाळासाहेब थोरात म्हणाले, राज्यात व तालुक्यात कोरोनाची साखळी संपुष्टात आणण्यासाठी प्रशासन चांगले काम करत आहे. मात्र त्याला नागरिकांची साथ मिळणे गरजेचे आहे. ग्रामीण भागामध्ये होणारे घरगुती समारंभ नागरिकांनी जाणीवपूर्वक टाळले पाहिजे. हा आरोग्यविषयक संकटांचा काळ असून या काळात भावनेपेक्षा वस्तुस्थितीला प्रत्येकाने महत्त्व द्यावे. गणेशोत्सव हा महाराष्ट्रातील धामधुमीचा उत्सव असतो, मात्र कोरोनाच्या संकटामुळे त्यावर काहीसे विरजण पडले आहे. उद्या होणाऱ्या गणेश विसर्जन सोहळ्यात नागरिकांनी नगरपालिकेने निर्माण केलेल्या संकलन केंद्रावर आपल्या घरातील गणेश मूर्ती व सामुहिक गणेश मूर्ती जमा कराव्यात. नदीकाठी कोणीही गर्दी करू नये, पाण्याचा वाढता प्रवाह धोकादायक असून कोणीही त्या ठिकाणी जाऊ नये. प्रशासनाने नेमून दिलेल्या ठिकाणीच गणेश मूर्ती व निर्माल्य यांचे संकलन करावे. गर्दी टाळणे हे आपले प्राथमिक उद्दिष्ट्ट असून त्यामुळे कोरोनाची साखळी वाढण्यापासून आपण रोखू शकतो, यासाठी नागरिकांनी सहकार्य करावे. तसेच प्रशासनानेही या काळात सतर्क राहावे, अशा सूचना मंत्रीमहोदयांनी दिल्या.
आ. डॉ.तांबे म्हणाले, गणेशोत्सव हा प्रत्येकाचा आनंदाचा उत्सव असतो. सर्वांनी गणेश उत्सव साध्या पद्धतीने घरात साजरा केला आहे. गणेश विसर्जनाच्या दिवशीही सर्वांनी प्रशासनाला सहकार्य करत नगरपालिकेने निर्माण केलेल्या तलावात व संकलन केंद्रात आपले गणपती जमा करावेत असे आवाहनही त्यांनी यावेळी केले.
नगराध्यक्ष सौ. दुर्गा तांबे म्हणाल्या, गणेश विसर्जनाच्या दिवशी सर्व नगरपालिकेचे कर्मचारी नागरिकांच्या मदतीसाठी तत्पर राहणार असून प्रत्येकावर जबाबदारी देण्यात आली आहे. प्रत्येक नागरिकाला आवाहन आहे की नदीकाठी कोणीही जाऊ नये, गर्दी करू नये, आपली गणेश मूर्ती जवळच्या संकलन केंद्रावर जमा करावी व प्रशासनाला सहकार्य करावे.
यावेळी तालुक्यातील विविध गावांतील परिस्थितीचा माहिती प्रांताधिकारी शशिकांत मंगरुळे यांनी मंत्रीमहोदयांना दिली. कोविड केअर सेंटरमधील नागरिकांची स्थिती, त्यांना पुरवल्या जाणाऱ्या सुविधांची माहिती तहसीलदार अमोल निकम यांनी दिली.